औरंगाबाद- विधानसभा अध्यक्ष हरिभाऊ बागडे यांचा मतदार संघ म्हणून राज्यभर परिचित असलेल्या फुलंब्री मतदारसंघात राजकीय हालचालींना वेग आला आहे. सूत्रांकडून मिळालेल्या माहितीनुसार भाजप आणि शिवसेना पक्षातील वाक्-युद्ध पाहता युती होणार नसल्याचीच लक्षण जास्त आहेत. त्यामुळे औरंगाबाद जिल्ह्याचे विद्यमान खासदार चंद्रकांत खैरे यांच्या तोडीस तोड उमेदवार जर कोणी असेल तर विधानसभा अध्यक्ष हरिभाऊ बागडेंचेच नाव समोर येते. त्यादृष्टीने बागडे यांनी देखील हालचाली सुरु केल्या आहेत.जर बागडेंनी लोकसभा लढवली तर अनुराधा चव्हाण यांचे नाव फुलंब्री विधानसभेसाठी निश्चित असेल.

शिवसेना भाजप यांच्यातील वाक्-युद्ध दिवसेंदिवस वाढतच जात आहे. लोकसभेच्या निवडणुका अगदी जवळ आलेल्या असून सुद्धा युती होण्याची कोणतीच चिन्ह दोन्ही पक्षांकडून दिसत नाहीत. शिवाय शिवसेना पक्षप्रमुखांकडून तर स्वबळावर लढण्याचीच तयारी जास्त प्रमाणात दाखवली जात आहे. त्यातच दोन्ही पक्षातील इच्छुकांपुढे मोठा पेच निर्माण झालेला आहे. कुठलीही हालचाल करावी की नाही या संभ्रमात हे लोक आहेत. मात्र औरंगाबाद लोकसभेसाठी खुद्द विधानसभा अध्यक्ष हरिभाऊ बागडे जोरदार तयारीला लागले आहेत. अशी माहिती सूत्रांकडून मिळते आहे . बागडे यांना २०१४ सालीच लोकसभा लढावायची होती मात्र पक्षाने त्यांना तिकीट नाकारले होते. शिवाय  लोकसभेला युती असल्याने ही जागा शिवसेनेलाच देण्यात आली होती. त्यामुळे २०१४ साली बागडे यांचे लोकसभा लढवण्याचे स्वप्न अपूर्ण राहिले होते. मात्र २०१९ साठी दोन्ही पक्षांकडून युतीची शक्यता कमी असल्याने दोन्ही पक्ष आपल्या आपल्या पद्धतीने स्वबळावर लढण्याची तयारी करत आहेत. औरंगाबाद लोकसभेसाठी विद्यमान खासदार चंद्रकांत खैरे यांच्या विरोधात तुल्यबळ उमेदवार देण्याची तयारी भाजपकडून केली जात आहे. सूत्रांनी दिलेल्या माहितीनुसार खा. खैरे यांना टक्कर देण्याची क्षमता असणारा भाजपचा एकमेव नेता औरंगाबाद मधून हरिभाऊ बागडे हेच आहेत.

बागडेंनंतर फुलंब्रीचा किल्ला कोण लढवणार ?

युती झाली नाहीतर बागडे लोकसभेच्या मैदानात उतरणार असल्याने फुलंब्री मतदार संघासाठी भाजपला नवीन उमेदवार शोधावा लागणार आहे. त्यामुळे राष्ट्रवादीला सोडचिठ्ठी देऊन भाजपच्या आश्रयाला आलेल्या अनुराधा चव्हाण यांचे नाव सध्या चर्चेत आहे. हरिभाऊ बागडेंच्या नंतर फुलंब्री मध्ये अनुराधा चव्हाण यांचेच भाजप मध्ये सध्या वजन असल्याची माहिती विश्वसनीय सूत्रांकडून मिळालेली आहे.